 |
| Miniatur masin pangolah sarok ! |
Oleh : Fadliriansyah Sikumbang
Eh, lah baserak lo sarok kini. Apo goran nan tajadi ?
Sahut Tan Baro ka Angku Rih
Persoalan sarok ko memang mangajuikan warga Payoukumbuah jo Kabupaten Limopuluah Koto, tibo - tibo sajo sarok manumpuak.
Sarok mosiak jo lombok kini baserak di sapanjang jalan, bau nyo koreh manyucuak iduang.
Ruponyo Tampek Pambuangan Akhir Sarok (TPAS) ko bona nan longsor, tanahnyo runtuah maimpok sawah jo porak urang Aua Kuniang, Payoukumbuah.
"Sahinggo ndak tontu kama ka dibuang sarok lai, tampek pangolahan sarok juo ndak ado di nagori kito ko doh," sabuik Angku Rih.
Tan Baro nan garuik - garuik kapalo, jo manutuik iduang pakai tangan ciek lai cuma bisa maangguak - angguak ajo.
"Sarancaknyo kito carikan solusi, kito parakai malah," kecek Tan Baro...
"Baa lo mamparakai nyo Tan ?" Tanyo Angku Rih.
Murah sajo, kito baka sampah ko, beko kito jadian bensin, gas LPG tu dan juo bisa untuak paving block nan kareh nyo, kato Tan Baro PeDe sambia maambuih - ambuih kan asok rokoknyo
"Baa lo caronyo ?" Tanyo Angku Rih baliak
"Ee yayai ! Itu gampang tu nyo, pakakeh di bengke Ambo langkok. Kito parakai beko, kito parakai !" Sahut Tan Baro.
Basigageh Tan Baro pai, maninggaan Angku Rih. Diracaknyo onda nan bamerek Sogun tu.
Dibukanyo baliak bengke lamo, dicaliaknyo alat - alat las nan masih ado. Cukuik banyak pakakeh Tan Baro. Mulai lah inyo mambuek sketsa "Pangolahan Sarok !"
***
Dirancangnyo ciek - ciek dek Tan Baro, pensil jo rol basi nyo bamain, ndak lupo kalkulator jo jangko untuak mandapekan ituang - ituang nan topek.
Gambar sudah, Tan Baro bajalan mancari bahan - bahan lain nan diparaluan, sarupo basi silinder, tabuang dan slang ayia.
"Tara,,, iko panamuan abad kini, masin pangolahan sarok. Tabuek dari barang - barang bekas," sabuik Tan Baro ka Angku Rih.
Tabuang silinder nantu tabuek dari pipa bekas PDAM, panjangnyo sakiro 5 meter, di las dek Tan Baro, diapakok ka duo ujuang e. Di bagian atehnyo dibuek lubang babantuak kotak, gunonyo untuak mamasuakan sarok - sarok plastik.
"Di ujuang ciek lai diagiah selang untuak manyalurkan gas, salanjuiknyo gas tu bisa dimasuakan ka tabuang gas LPG. Jadi masyarakat nan mambao sarok plastik, bisa ditukaan jo tabuang gas," arok Tan Baro.
Kudian dari tabuang gas tu juo, bisa pulo dibuek slang ciek lai, untuak kalua nyo minyak. Konon minyak itu bisa sebagai pangganti bensin, warnanyo kuniang sarupo bensin.
Nah, sasudah proses itu, tabuang silinder tadi diputa, lubang tampek masuak sarok tu diadokan ka bawah, ditampuang jo cetakan paving block.
"Sahinggo jadi lah, masin pangolahan sarok, kelas industri. Kapasitas nyo bisa ditingkekan sasuai jo ukuran tabuang silinder," pungkeh Tan Baro. .
Panulih : Fadli Riansyah Putra Sikumbang
